Novum Testamentum Hebraice. Ad Galatas

אֶל-הַגָּלָטִיִּים

א    1 פּוֹלוֹס שָׁלִיחַ שֻׁלַּח לֹא מֵאֵת אֲנָשִׁים וְלֹא עַל-פִּי אֲנָשִׁים כִּי אִם-עַל-פִּי יֵשׁוּעַ הַמָּשִׁיחַ וֵאלֹהִים אֲבִי-כֹל אֲשֶׁר הֲקִימוֹ מִן-הַמֵּתִים׃ 2 וְכָל-הָאַחִים אֲשֶׁר אִתִּי אֶל-קְהִלּוֹת גָּלַטְיָא׃ 3 חֶסֶד וְשָׁלוֹם יִתֵּן לָכֶם אֱלֹהִים אָבִינוּ וְיֵשׁוּעַ הַמָּשִׁיחַ אֲדֹנֵינוּ׃ 4 אֲשֶׁר-נָתַן אֶת-נַפְשׁוֹ לְכַפֵּר עַל-חַטֹּאתֵינוּ וּלְהַצִּילֵנוּ מִן-הָעוֹלָם הָרָע הַזֶּה כִּרְצוֹן אֱלֹהִים אָבִינוּ׃ 5 אֲשֶׁר-לוֹ הַכָּבוֹד לְעוֹלָם וָעֶד אָמֵן׃ 6 תִּמָּהוֹן אֲחָזַנִי כִּי-כֹה מְהֵרָה סַרְתֶּם מֵאַחֲרֵי הַקֹּרֵא אֶתְכֶם בְּחֶסֶד מְשִׁחֵנוּ וַתֵּלְכוּ אַחֲרֵי בְשׂרָה אַחֶרֶת׃ 7 וְהִיא אֵינֶנָּה בְשׂרָה אֲבָל יֵשׁ אֲנָשִׁים הָעֹכְרִים אֶתְכֶם וְהַמְבַקְשִׁים לִבְלֹל בְּשׂרַת הַמָּשִׁיחַ בָּלֹל וְהָפֹךְ עַל-פָּנֶיהָ׃ 8 אָכֵן אִם-גַּם אֲנַחְנוּ אוֹ-מַלְאָךְ מִן-הַשָּׁמַיִם יַשְׁמִיעֲכֶם בְּשׂרָה אַחֶרֶת אֲשֶׁר לֹא הִשְׁמַעֲנוּהָ יָחֳרָם׃ 9 כָּזֶה אָמַרְנוּ מֵאָז וְכֵן אֲנִי אֹמֵר עוֹד-הַפָּעַם וְאִם יַשְׁמִיעֲכֶם אִישׁ בְּשׂרָה מִבַּלְעֲדֵי זוּ אֲשֶׁר קִבַּלְתֶּם יָחֳרָם׃ 10 כִּי הַמְפַתֶּה אֲנָשִׁים אֲנִי עַתָּה אוֹ מְדַבֵּר דְּבָרַי לִפְנֵי אֱלֹהִים הַאִם לְהָפִיק רָצוֹן מִבְּנֵי אָדָם אֲנִי מְבַקֵּשׁ כִּי לוּ-בִּקַּשְׁתִּי לְהָפִיק רָצוֹן מִבְּנֵי אָדָם לֹא הָיִיתִי עֶבֶד לַמָּשִׁיחַ׃ 11 וַאֲנִי מַגִּיד לָכֶם אֶחָי כִּי הַבְּשׂרָה אֲשֶׁר נוֹדְעָה לָכֶם מִפִּי לֹא מִמְּקוֹר אָדָם יָצָאָה׃ 12 כִּי גַּם-אָנֹכִי לֹא מִפִּי אָדָם קִבַּלְתִּיהָ וְלֹא הֹרַנִי בֶן-אֱנוֹשׁ כִּי אִם-בֶּחָזוֹן מֵאֵת יֵשׁוּעַ הַמָּשִׁיחַ׃ 13 כִּי הֲלֹא-שְׁמַעְתֶּם הֲלִיכוֹתַי לְפָנִים בַּדָּת הַיְּהוּדִית וְאֶת-עֲדַת אֱלֹהִים רָדַפְתִּי לְבַלַּע וּלְהַשְׁחִית׃ 14 וְהוֹסַפְתִּי דַעַת בְּדֵעוֹת הַיְּהוּדִית מֵרַבִּים בִּבְנֵי גִילִי בְּקֶרֶב עַמִּי וְקִנְאָה גְדוֹלָה קִנֵּאתִי לְקַבָּלַת אֲבוֹתָי׃ 15 אַךְ הָאֱלֹהִים אֲשֶׁר הִבְדִּילַנִי מִמְּעֵי אִמִּי וַאֲשֶׁר קְרָאַנִי בְּחַסְדּוֹ׃ 16 כַּאֲשֶׁר חָפֵץ לְגַלּוֹת לִי אֶת-בְּנוֹ לְבַשֵּׂר יְשׁוּעָתוֹ בַגּוֹיִם לֹא נוֹעַצְתִּי עִם-בָּשָׂר וָדָם אַף לֹא כְּרָגַע׃ 17 וְגַם לֹא-עָלִיתִי יְרוּשָׁלַיְמָה אֶל-הַשְּׁלִיחִים אֲשֶׁר קִדְּמוּנִי כִּי אִם-הָלַכְתִּי לַעֲרָב וּמִשָּׁם שַׁבְתִּי לְדַמָּשֶׂק׃ 18 וּמִקֵּץ שָׁלֹשׁ שָׁנִים עָלִיתִי אָז יְרוּשָׁלַיְמָה לִרְאוֹת אֶת-כֵּיפָא וָאֵשֵׁב עִמּוֹ חֲמִשָּׁה עָשָׂר יוֹם׃ 19 וְלֹא-רָאִיתִי אִישׁ אַחֵר מִן-הַשְּׁלִיחִים זוּלָתִי יַעֲקֹב אֲחִי הָאָדוֹן׃ 20 וְזֹאת אֲנִי כֹתֵב פֹּה נֶגֶד אֱלֹהִים וְלֹא אֲכַזֵּב׃ 21 וְאַחֲרֵי-כֵן בָּאתִי אֶל-גְּלִילוֹת אֲרָם וְקִילִקְיָא׃ 22 אֲבָל קְהִלּוֹת הַמָּשִׁיחַ אֲשֶׁר בְּאֶרֶץ יְהוּדָה לֹא נוֹדַעְתִּי לָהֶם פָּנִים בְּפָנִים׃ 23 אַךְ-זֹאת שָׁמְעוּ כִּי-זֶה הָאִישׁ אֲשֶׁר רְדָפָם מֵאָז מְבַשֵּׂר כַּיּוֹם בְּשׂרַת הָאֱמוּנָה אֲשֶׁר הִכְחִידָהּ מִקֶדֶם׃ 24 וַיִּתְּנוּ כָבוֹד לֵאלֹהִים בִּגְלָלִי׃

ב    1 וּמִקֵּץ אַרְבַּע עֶשְׂרֵה שָׁנָה עָלִיתִי עוֹד יְרוּשָׁלַיְמָה עִם בַּר-נַבָּא וְגַם אֶת-טִיטוֹס לָקַחְתִּי עִמָּדִי׃ 2 וַאֲנִי עָלִיתִי שָׁמָּה כַּאֲשֶׁר צֻוֵּיתִי בֶחָזוֹן וְדִבְרֵי הַבְּשׂרָה כַּאֲשֶׁר קָרָאתִי בְקֶרֶב הַגּוֹיִם שַׂמְתִּי לִפְנֵיהֶם וְאַחֲרֵי-כֵן לִפְנֵי קְרִיאֵי הָעֵדָה לְבָד לְמַעַן לֹא יִהְיֶה לָרִיק אֲשֶׁר אָחִישׁ לַעֲשׂוֹת וַאֲשֶׁר חַשְׁתִּי מֵאָז׃ 3 וְגַם-טִיטוֹס אָשֶׁר עִמָּדִי כִּי-יְוָנִי הוּא לֹא נָטַל עָלָיו לְהִמּוֹל׃ 4 בַּעֲבוּר אֲחֵי שֶׁקֶר אֲשֶׁר הִתְגַּנְּבוּ וַיָּבֹאוּ לָתוּר אֶת-הַחֹפֶשׁ אָשֶׁר-לָנוּ בְּיֵשׁוּעַ הַמָּשִׁיחַ לְמַעַן הַעֲבִידֵנוּ׃ 5 וְלֹא-נִפְתָּה לִבֵּנוּ לְהִכָּנַע מִפְּנֵיהֶם אַף-לֹא כְרָגַע לְמַעַן יַעֲמֹד עִמָּכֶם קֹשְׁטְ הַבְּשׂרָה לְעוֹלָם׃ 6 וְלָאֵלֶּה הַמְסֻלָּאִים בְּעֶרְכָּם אִם עֶרְכָּם כֵּן אוֹ כֵן לֹא שַׂמְתִּי אֶת-לִבִּי אֱלֹהִים לֹא יִשָּׂא פְנֵי-אִישׁ וְהַמְסֻלָּאִים הַאֵלֶּה לֹא הוֹסִיפוּ לִי מְאוּמָה׃ 7 אַךְ לְהֶפֶךְ הֵם רָאוּ כִּי-פְקֻדָּה נִתְּנָה-לִּי לְבַשֵּׂר בְּקֶרֶב הָעֲרֵלִים כַּאֲשֶׁר נִתְּנָה לְפֶטְרוֹס לְבַשֵּׂר בְּקֶרֶב הַנִּמּוֹלִים׃ 8 כִּי-הַנֹּתֵן כֹּחַ לְפֶטְרוֹס לִהְיוֹת שָׁלוּחַ אֶל-הָנִּמּוֹלִים הוּא נָתַן לִי כֹּחַ לִהְיוֹת שָׁלוּחַ אֶל-הַגּוֹיִם׃ 9 וְכַאֲשֶׁר רָאוּ יַעֲקֹב וְכֵיפָא וְיוֹחָנָן הַנֶּחֱשָׁבִים לְעַמּוּדֵי הַקְּהִלָּה כִּי-חֶסֶד אֵל עָלָי נָתְנוּ לִי וּלְבַר-נַבָּא אֶת-יַד יְמִינָם לְאוֹת אַחֲוָה לֵאמֹר כִּי אֲנַחְנוּ נֵלֵךְ אֶל-הַגּוֹיִם וְהֵם אֶל-הַנִּמּוֹלִים׃ 10 אַךְ אִם-נִזְכֹּר אֶת-הָעֲנִיִּים אֲשֶׁר גַּם-שָׁקַדְתִּי לַעֲשׂוֹת כֵּן׃ 11 אֲבָל בְּבֹא כֵיפָא לְאַנְטִיּוֹכְיָא הוֹכַחְתִּיו עַל-פָּנָיו כִּי נִמְצָא בוֹ דְּבַר אַשְׁמָה׃ 12 כִּי עַד-לֹא בָּאוּ אֲנָשִׁים מֵאֵת יַעֲקֹב אָכַל יַחְדָּו אֶת-הַגּוֹיִם אַךְ אַחֲרֵי בֹאָם נִבְדַּל מֵהֶם וַיִּפָּרֵד מִיִּרְאָתוֹ אֶת-הַנִּמּוֹלִים׃ 13 וְכֵן גַּם-שְׁאָר הַיְּהוּדִים הִתְכַּחֲשׁוּ עִמּוֹ עַד כִּי-גַם-בַּר-נַבָּא נִתְפַּשׂ בְּכַחֲשָׁם׃ 14 וַאֲנִי בִרְאֹתִי כִּי לֹא יֵלְכוּן נְכֹחָה לְפִי בְשׂרַת הָאֶמֱת אָמַרְתִּי אֶל-כֵּיפָא לְעֵינֵי-כֹל אִם-אַתָּה הַיְּהוּדִי תֵּלֵךְ בְּדֶרֶךְ הַגּוֹיִם וְלֹא בְדֶרֶךְ הַיְּהוּדִים מַדּוּעַ זֶה תְּאַלֵּץ אֶת-הַגּוֹיִם לְהִתְיַהֵד׃ 15 הֵן מִזֶּרַע הַיְּהוּדִים נוֹלָדְנוּ וְלֹא מִזֶּרַע הַגּוֹיִם הַחַטָּאִים בְּנַפְשׁוֹתָם׃ 16 וְאַחֲרֵי אֲשֶׁר יָדַעְנוּ כִּי לֹא-יִצְדַּק אִישׁ בְּחֻקּוֹת הַתּוֹרָה כִּי אִם-בֶּאֱמוּנַת יֵשׁוּעַ הַמָּשִׁיחַ גַּם-אֲנַחְנוּ בָאנוּ לְהַאֲמִין בְּיֵשׁוּעַ הַמָּשִׁיחַ לְמַעַן נִצְדַּק בֶּאֱמוּנַת הַמָּשִׁיחַ וְלֹא בְחֻקּוֹת הַתּוֹרָה כִּי בְחֻקּוֹת הַתּוֹרָה לֹא יִצְדַּק כָּל-בָּשָׁר׃ 17 וְעַתָּה כִּי נְבַקֵּשׁ צִדְקָתֵנוּ בַּמָּשִׁיחַ וּבְכָל-זֹאת עָוֹן יִמָּצֵא בָנוּ הֲיִהְיֶה הַמָשִׁיחַ כֹּהֵן לֶעָוֹן חָלִילָה׃ 18 כִּי אִם-אָשׁוּב וְאֶבְנֶה אֶת-אֲשֶׁר הָרָסְתִּי הִנְנִי מֵעִיד בְּנַפְשִׁי כִּי פֹשֵׁעַ אָנִי׃ 19 כִּי-כַּמֵּת נֶחֱשַׁבְתִּי לַתּוֹרָה עַל-פִּי הַתּוֹרָה לְמַעַן אֶחְיֶה לֵאלֹהִים׃ 20 הִנְנִי צָלוּב עִם-הַמָּשִׁיחַ וְחַי אָנֹכִי אַךְ לֹא-אָנֹכִי כִּי אִם-הַמָּשִׁיחַ חַי בִּי וְרוּחַ הַחַיִּים אֲשֶׁר בִּבְשָׂרִי כַּיּוֹם קָנִיתִי בֶאֱמוּנָתִי בְּבֶן-הָאֱלֹהִים אֲשֶׁר אָהַב אֹתִי וַיִּתֵּן אֶת-נַפְשׁוֹ כָּפְרִי׃ 21 לֹא אֶעֱשֶׂה אֶת-חֶסֶד הָאֱלֹהִים לְאָיִן כִּי אִם-תִמָּצֵא צְדָקָה עַל-יְדֵי הַתּוֹרָה אָז הַמָּשִׁיחַ מֵת חִנָּם׃

ג    1 הוֹי גָּלָטִיִּים סְכָלִים מִי הִשְׁמִין בִּכְשָׁפִים לִבְּכֶם מִשְׁמֹעַ אֶל-הָאֱמֶת אַחֲרֵי אֲשֶׁר יֵשׁוּעַ הַמָּשִׁיחַ הַצָּלוּב הָיָה חָרוּת בְּתוֹכֲכֶם כְּמוֹ עַל-לוּחַ לְעֵינֵיכֶם׃ 2 רַק זֹאת חָפַצְתִּי לִשְׁמֹע מִפִּיכֶם אֵיךְ קִבַּלְתֶּם אֶת-הָרוּחַ עֵקֶב חֻקּוֹת הַתּוֹרָה אוֹ עֵקֶב כֹּחַ הָאֱמוּנָה׃ 3 הַאִם כָּזֹאת נִסְכַּלְתֶּם אַחֲרֵי אֲשֶׁר הַחִלֹּתֶם לִהְיוֹת אַנְשֵׁי רוּחַ תַּשְׁלִימוּ עַתָּה בְּחֻקּוֹת הַבָּשָׂר׃ 4 לָמָּה-זֶּה נְשָׂאתֶם עָמָל רָב חִנָּם אִם לֹא לְעֵזֶר הוּא וְלֹא לְהוֹעִיל׃ 5 הִנֵּה הַמַּאֲצִיל מִן-הָרוּחַ עֲלֵיכֶם אוֹ הָעֹשֶׂה בָכֶם נִפְלָאוֹת הֲיַעֲשֶׂה כָזֹאת בְּחֻקּוֹת הַתּוֹרָה אוֹ בְכֹחַ הָאֱמוּנָה׃ 6 כַּאֲשֶׁר גַּם-אַבְרָהָם הֶאֱמִין בֵּאלֹהִים וַיַּחְשׁבֶהָ לּוֹ צְדָקָה׃ 7 עַל-כֵּן דְּעוּ-נָא כִּי-בְנֵי הָאֱמוּנָה בְּנֵי אַבְרָהָם הֵמָּה׃ 8 וְהַמִּקְרָא צָפָה מֵרֹאשׁ כִּי עָתִיד לְהַצְדִּיק אֶת-הַגּוֹיִם בֶּאֱמוּנָה הִקְדִּים לְבַשֵּׂר אֶת-אַבְרָהָם לֵאמֹר וְנִבְרְכוּ בְךָ כָּל-הַגּוֹיִם׃ 9 עַל-כֵּן רַק אַנְשֵׁי אֱמוּנָה יִתְבָּרְכוּ עִם-אַבְרָהָם אִישׁ אֱמוּנִים׃ 10 אֲבָל הַבֹּטְחִים עַל-מִצְוֹת הַתּוֹרָה יִמְצְאוּ קְלָלָה בְצִדָּהּ כִּי כָתוּב אָרוּר אֲשֶׁר לֹא-יָקִים אֶת-כָּל-הַדְּבָרִים הַכְּתוּבִים בְּסֶפֶר הַתּוֹרָה לַעֲשׂוֹת אוֹתָם׃ 11 וְכִי עַל-יְדֵי הַתּוֹרָה לֹא-יִצְדַּק אִישׁ לִפְנֵי אֱלֹהִים דָּבָר בָּרוּר הוּא כִּי-צַדִּיק בֶּאֱמוּנָתוֹ יִחְיֶה׃ 12 וְהַתּוֹרָה לֹא אֱמוּנָה תְבַקֵּשׁ כִּי אִם-אֶת-הָאָדָם אֲשֶׁר יַעֲשֶׂה אֶת-מִשְׁפָּטֶיהָ וָחַי בָּהֶם׃ 13 הַמָּשִׁיחַ פָּדָה אֶת-נַפְשֵׁנוּ מִקִּלְלַת הַתּוֹרָה בַּאֲשֶׁר הָיָה לִקְלָלָה תַּחְתֵּינוּ כִּי כָתוּב אָרוּר כָּל-הַתָּלוּי עַל-הָעֵץ׃ 14 וּבָזֹאת עַל-יְדֵי יֵשׁוּעַ הַמָּשִׁיחַ גַּם-הַגּוֹיִם יִתְבָּרְכוּ בְּבִרְכַת אַבְרָהָם וְהָרוּחַ אֲשֶׁר אָמַר אֱלֹהִים לְתִתּוֹ נְקַבֵּל עֵקֶב אֱמוּנָה׃ 15 אַחַי כְּדֶרֶךְ בְּנֵי-אָדָם אֲנִי מְדַבֵּר גַּם-בְּרִית אֲשֶׁר כָּרַת אַחַד הָאֲנָשִׁים וַיְקַיֵּם אֹתָהּ כַּמִּשְׁפָּט לֹא יְפִירֶנָּה אִישׁ וְלֹא יְשַׁנֶּה-בָּהּ דָּבָר׃ 16 וְהִנֵּה הַהַבְטָחוֹת נֶאֶמְרוּ לְאַבְרָהָם וּלְזַרְעוֹ וְלֹא-אָמַר וְלִזְרָעֶיךָ בְּרַבִּים כִּי אִם-וּלְזַרְעֲךָ בְּיָחִיד וְהוּא הַמָּשִׁיחַ׃ 17 וְזֶה הַדָּבָר אֲשֶׁר אָמָרְתִּי כִּי הַבְּרִית אֲשֶׁר כָּרַת אֱלֹהִים בַּמָּשִׁיחַ מִקֶּדֶם וַיְקַיֵּם אֹתָהּ לֹא תוּכַל הַתּוֹרָה הַנְּתוּנָה אַחֲרֵי אַרְבַּע מֵאוֹת וּשְׁלֹשִׁים שָׁנָה לְהָפֵר אֹתָהּ עַד-שִׂים אֶת-הַהַבְטָחָה לְאָיִן׃ 18 כִּי אִם-תִּנָּתֵן הַמּוֹרָשָׁה בְּכֹחַ הַתּוֹרָה לֹא-תִהְיֶה עוֹד בֵּכֹחַ הַהַבְטָחָה אֲבָל לְאַבְרָהָם נְתָנָהּ אֱלֹהִים בְּהַבְטָחָה לְפִי-חָסֶד׃ 19 אִם-כֵּן לָמָּה-זֶּה נוֹסְפָה הַתּוֹרָה לְמַעַן יִוָּדַע הַפֶּשַׁע כִּי-רַב הוּא עַד כִּי-יָבוֹא הַזֶּרַע אֲשֶׁר-לוֹ מִשְׁפַּט הַהַבְטָחָה וְזֹאת הַתּוֹרָה עֲרוּכָה עַל-פִּי הַמַּלְאָכִים וּנְתוּנָה בְּיַד אִישׁ הַבֵּנָיִם׃ 20 אֲבָל אִישׁ בֵּנַיִם לֹא לְאֶחָד הוּא וֵאלֹהִים הוּא אֶחָד׃ 21 וְעַתָּה הֲכִי הַתּוֹרָה נֶגֶד הַבְטְחוֹת אֵל חָלִילָה כִּי לוּ נִתְּנָה תוֹרָה אֲשֶׁר בְּכֹחָהּ לָתֵת חַיִּים אָז הָיְתָה גַם-הַצְּדָקָה בְּיַד הַתּוֹרָה׃ 22 אֲבָל כִּתְבֵי הַקֹּדֶשׁ יַגִּידוּן כִּי כָל-אָדָם חֹטֵא וּבָזֹאת בֶּאֱמוּנַת יֵשׁוּעַ הַמָּשִׁיחַ תָּבוֹא הַהַבְטָחָה אֶל-הַמַּאֲמִינִים׃ 23 וְלִפְנֵי בֹא הָאֱמוּנָה הָיִינוּ שְׁמֻרִים בַּמִּשְׁמָר תַּחַת יְדֵי הַתּוֹרָה כַּאֲסִירֵי הָאֱמוּנָה הָעֲתִידָה לְהִגָּלוֹת׃ 24 וּבְכֵן הָיְתָה לָּנוּ הַתּוֹרָה לְאֹמֶנֶת לְנַהֲגֵנוּ אֶל-הַמָּשִׁיחַ אֲשֶׁר מִשָּׁם נִצְדַּק בָּאֱמוּנָה׃ 25 אַךְ עַתָּה אַחֲרֵי אֲשֶׁר נִגְלְתָה הָאֱמוּנָה לֹא עוֹד אֲנַחְנוּ תַּחַת יַד הָאֹמָנֶת׃ 26 כִּי-כֻלְּכֶם בְּנֵי אֱלֹהִים אַתֶּם עֵקֶב אֱמוּנַתְכֶם בְּיֵשׁוּעַ הַמָּשִׁיחַ׃ 27 כִּי כָל-אֵלֶּה מִכֶּם אֲשֶׁר נִטְבְּלוּ בְשֵׁם הַמָּשִׁיחַ לָבְשׁוּ אֶת-הַמָּשִׁיחַ׃ 28 וְאֵין עוֹד פֹּה לֹא יְהוּדִי וְלֹא יְוָנִי לֹא עֶבֶד וְלֹא בֶּן-חוֹרִים לֹא זָכָר וְלֹא נְקֵבָה כִּי כֻלְּכֶם אֶחָד בְּיֵשׁוּעַ הַמָּשִׁיחַ׃ 29 וְאִם-לַמָּשִׁיחַ אַתֶּם זֶרַע אַבְרָהָם הִנְּכֶם וְיוֹרְשֵׁי הַמּוֹרָשָׁה לְפִי הַהַבְטָחָה׃

ד    1 וַאֲנִי אֹמֵר הַיּוֹרֵשׁ כָּל-עוֹד הוּא יֶלֶד אֵינֶנּוּ מְשֻׁנֶּה מֵעָבֶד אַף כִּי-הוּא אֲדוֹן כָּל-הַנַּחֲלָה׃ 2 וְהוּא נָתוּן בִּידֵי בֶן-מֶשֶׁק הַבַּיִת וּפְקִידָיו עַד הַיּוֹם הַהוּא אֲשֶׁר יָעַד לוֹ אָבִיו׃ 3 כֵּן גַּם-אֲנַחְנוּ בִּימֵי הַיַּלְדוּת כַּעֲבָדִים הָיִינוּ לִיסֹדוֹת הָרָאשִׁים הַשְּׁפָלִים בֶּחָלֶד׃ 4 אַךְ כַּאֲשֶׁר מָלְאוּ הַיָּמִים שָׁלַח אֱלֹהִים אֶת-בְּנוֹ אֲשֶׁר נוֹלַד מֵרֶחֶם אִשָּׁה וַאֲשֶׁר נָתוּן תַּחַת מִשְׁטַר הַתּוֹרָה׃ 5 לִפְדּוֹת אֶת-הַנְּתוּנִים תַּחַת מִשְׁטַר הַתּוֹרָה לְמַעַן נְקַבֵּל מִשְׁפַּט הַבָּנִים׃ 6 וְיַעַן בָּנִים אַתֶּם שָׁלַח אֲלֵיכֶם אֱלֹהִים אֶת-רוּחַ בְּנוֹ בְּקֶרֶב לְבָבֵנוּ אֲשֶׁר תִּקְרְאוּ-בוֹ אָבִינוּ אָבִינוּ׃ 7 עַל-כֵּן אֵינְךָ עוֹד עֶבֶד כִּי בֵן אָתָּה וְאִם-בֵּן גַּם-יוֹרֵשׁ נַחֲלַת הָאֱלֹהִים עַל-יְדֵי הַמָּשִׁיחַ׃ 8 וְהִנֵּה לְפָנִים טֶרֶם יְדַעְתֶּם אֶת-הָאֱלֹהִים הִשְׁתַּחֲוִיתֶם לְלֹא-אֱלֹהֵי אֱמֶת׃ 9 וְעַתָּה אַחֲרֵי אֲשֶׁר יְדַעְתֶּם אֶת-הָאֱלֹהִים וְאַף גַּם-נוֹדַעְתֶּם לוֹ אֵיךְ תָּשׁוּבוּ אֶל-הַיְסֹדוֹת הַשְּׁפָלִים הָאֲמֵלָלִים כִּי תַחְפְּצוּ לְעָבְדָם עוֹד׃ 10 אַתֶּם שֹׁמְרִים יָמִים וָחֳדָשִׁים וּמוֹעֲדִים וְשָׁנִים׃ 11 וַאֲנִי יָרֵאתִי כִּי כֹחִי כִּלִּיתִי בָכֶם לָרִיק׃ 12 הֱיוּ-נָא כָמֹנִי כַּאֲשֶׁר גַּם-אֲנִי כְמוֹכֶם רְאוּ הִנְנִי מִתְחַנֵּן אֲלֵיכֶם אַחַי כִּי מֵעוֹדְכֶם לֹא עֲשִׂיתֶם-לִי רָעָה׃ 13 וְאַתֶּם יֹדְעִים כִּי בְלֹא כֹחַ בְּעַצְמוֹתָי הוֹדַעְתִּי אֶתְכֶם אֶת-הַבְּשׂרָה בַּתְּחִילָּה׃ 14 וּבְכוּר עָנְיִי הַצֹּרֵף בְּשָׂרִי לֹא מְאַסְתֶּם וְלֹא גְעַלְתֶּם גִּי כְמַלְאַךְ אֱלֹהִים רְאִיתֶם פָּנַי כִּרְאוֹת פְּנֵי יֵשׁוּעַ הַמָּשִׁיחַ׃ 15 וְאַיֵּה אֵפוֹא עַתָּה אָשְׁרְכֶם עֵד אֲנִי לָכֶם כִּי בְהִדָּרֵשׁ מִכֶּם גַּם-עֵינֵיכֶם תְּנַקְּרוּן לְתִתָּן-לִי׃ 16 הַאִם לְאוֹיֵב הָיִיתִי עָתָּה בַּעֲבוּר הָאֱמֶת אֲשֶׁר אַגִּיד לָכֶם׃ 17 לֹא טוֹבָה קִנְאַת הַמְקַנְאִים לָכֶם הַחֲפֵצִים לְהַפְרִיד בֵּין הַדְּבֵקִים לְמַעַן בָּהֶם תִּדְבָּקוּן׃ 18 טוֹב הוּא לְקַנֵּא תָמִיד לְדָבָר טוֹב וְלֹא לְבַד בִּרְאֹתְכֶם אֶת-פָּנָי׃ 19 יְלָדַי עוֹד הַפַּעַם חֶבְלֵי לֵדָה יֹאחֲזֻנִי עֲלֵיכֶם עַד אֲשֶׁר-יוּצַר בָּכֶם הַמָּשִׁיחַ׃ 20 וְזֶה חֶפְצִי עַתָּה לִהְיוֹת עִמָּכֶם וּלְשַׁנּוֹת אֶת-קוֹלִי כִּי בִמְבוּכָה אֲנִי עַל-אֹדוֹתֵיכֶם׃ 21 אִמְרוּ לִי אַתֶּם הַחֲפֵצִים לִהְיוֹת תַּחַת מִשְׁטַר הַתּוֹרָה הַאִם לֹא תָבִינוּ דִּבְרֵי הַתּוֹרָה׃ 22 הֵן כָּתוּב כִּי שְׁנֵי בָנִים הָיוּ לְאַבְרָהָם הָאֶחָד מִן-הַשִּׁפְחָה וְהַשֵּׁנִי מִן-הַגְּבִירָה׃ 23 בֶּן-הַשִּׁפְחָה נוֹלַד כְּדֶרֶךְ כָּל-בָּשָׂר וּבֶן-הַגְּבִירָה בִּדְבַר אֱלֹהִים׃ 24 וְאֵלֶּה הַדְּבָרִים הֵם לְמָשָׁל כִּי שְׁתֵּי בְרִיתוֹת הֵנָּה הָאַחַת מֵהַר סִינַי הַיֹּלֶדֶת יְלָדֶיהָ לְעַבְדוּת וְזֹאת הִיא הָגָר׃ 25 כִּי הָגָר הִיא הַר סִינַי בַּעֲרָב וְדָמְתָה לִירוּשָׁלַיִם כַּיּוֹם כַּאֲשֶׁר הִיא בְעַבְדוּתָהּ עִם-בָּנֶיהָ׃ 26 אַךְ יְרוּשָׁלַיִם אֲשֶׁר לְמַעְלָה הִיא עִיר הַחֹפֶשׁ וְהִיא הָאֵם לְכֻלָּנוּ׃ 27 כִּי כָתוּב׃ 28 רָנִּי עֲקָרָה לֹא יָלָדָה פִּצְחִי רִנָּה וְצַהֲלִי לֹא-חָלָה כִּי-רַבִּים בְּנֵי-שׁוֹמֵמָה מִבְּנֵי בְעוּלָה׃ 29 אוּלָם אֶחָי כְּיִצְחָק כֵּן בְּנֵי הַהַבְטָחָה אֲנָחְנוּ׃ 30 וְכַאֲשֶׁר הַנּוֹלָד אָז כְּדֶרֶךְ כָּל-בָּשָׂר רָדַף אֶת-הַנּוֹלָד עַל-פִּי רוּחַ אֱלֹהִים כֵּן גַּם-עָתָּה׃ 31 אֲבָל מָה אֹמֵר הַכָּתוּב גָּרֵשׁ הָאָמָה הַזֹּאת וְאֶת-בְּנָהּ כִּי לֹא יִירַשׁ בֶּן-הָאָמָה הַזֹּאת עִם בֶּן-הַגְּבִירָה׃ 32 עַל-כֵּן אַחַי לֹא-בְּנֵי הָאָמָה אֲנַחְנוּ כִּי אִם-בְּנֵי-חוֹרִים׃

ה    1 עַל-כֵּן עִמְדוּ הָכֵן בַּחֹפֵשׁ אֲשֶׁר נָתַן לָנוּ הַמָּשִׁיחַ וְאַל-תִּתָּפְשׂוּ עוֹד בְּעֹל הָעַבְדוּת׃ 2 הִנֵּה אֲנִי פוֹלוֹס מַגִּיד לָכֶם אִם-תִּמּוֹלוּ הַמָּשִׁיחַ לֹא-לְהוֹעִיל לָכֶם׃ 3 וְעוֹד אֲנִי מַזְהִיר כָּל-אִישׁ אֲשֶׁר יִמּוֹל מְצֻוֶּה הוּא לַעֲשׂוֹת אֶת-כָּל-דִּבְרֵי הַתּוֹרָה׃ 4 נִפְרָדִים מֵעִם הַמָּשִׁיחַ אַתֶּם הַמִּצְטַדְּקִים בַּתּוֹרָה וְנָסוֹג מֵאַחַר הֶחָסֶד׃ 5 כִּי-אֲנַחְנוּ בְּרוּחַ וּבֶאֱמוּנָה נִשָּׂא עֵינֵינוּ אֶל-צְדָקָה כַּאֲשֶׁר קִוִּינוּ לָהּ׃ 6 כִּי לִפְנֵי יֵשׁוּעַ הַמָּשִׁיחַ אֵין-יֶתֶר עָז לֹא לַמּוּלָה וְלֹא לָעָרְלָה כִּי אִם-לֶאֱמוּנָה בַּעֲלַת פְּעָלִים בְּאַהֲבָה׃ 7 וְאַתֶּם מְרוּצַתְכֶם טוֹבָה הָיָתָה מִי סָגַר עֲלֵיכֶם מֵהַשֵּׂג אֶת-הָאֱמֶת׃ 8 לֹא מִפִּי הַקֹּרֵא אֶתְכֶם דִּבְרֵי מְפַתֵּיכֶם יָצָאוּ׃ 9 מְעַט שְׂאֹר יַחֲמִיץ אֵת כָּל-הָעֲרִיסָה׃ 10 וַאֲנִי בֹטֵחַ בָּכֶם לִפְנֵי אֲדֹנֵינוּ כִּי מַחֲשָׁבָה זָרָה לֹא תַעֲלֶה עַל-לִבְּכֶם אַךְ הָעֹכֵר אֶתְכֶם וִיהִי מִי שֶׁיִּהְיֶה עֲוֹנוֹ יִשָּׂא׃ 11 וַאֲנִי אַחַי אִם עוֹד אֶקְרָא לְהִמּוֹל עַל-מַה-זֶּה אֲנִי נִרְדָּף הֲלֹא סָר מִכְשׁוֹל הַצְּלִיב וְאֵינֶנּוּ׃ 12 מִי-יִתֵּן אֵפוֹא וּמְסַלְּפֵי דַרְכֵיכֶם יִמָּלוּ׃ 13 כִּי דְרוֹר נִקְרָא לָכֶם אַחַי אַךְ לֹא דְרוֹר לְהַחֲטִיא אֶת-בְּשַׂרְכֶם כִּי אִם-לַעֲבֹד אִישׁ אֶת-רֵעֵהוּ בְּאַהֲבָה׃ 14 כִּי כָל-הַתּוֹרָה תּוּקַם בַּמִּצְוָה הָאַחַת הַזֹּאת וְאָהַבְתָּ לְרֵעֲךָ כָּמוֹךָ׃ 15 אַךְ אִם-תְּנַשְּׁכוּ וְתֹאכְלוּ אִישׁ אֶת-רֵעֵהוּ רְאוּ פֶּן-אִישׁ בְּיַד רֵעֵהוּ תִּסָּפוּ׃16 וַאֲנִי הִנְנִי אֹמֵר הִתְהַלְּכוּ כְאַנְשֵׁי רוּחַ וְאָז לֹא תְמָלְאוּן אֶת תַּאֲוַת הַבָּשָׂר׃ 17 כִּי הַבָּשָׂר מִתְאַוֶּה אֶת-אֲשֶׁר לֹא יֹאבֶה הָרוּחַ וְהָרוּחַ אֶת-אֲשֶׁר לֹא יֹאבֶה הַבָּשָׂר כִּי שְׁנֵיהֶם צָרִים זֶה לָזֶה עַד אֲשֶׁר לֹא תוּכְלוּן עֲשׂוֹת כַּאֲשֶׁר תַּחְפֹּצוּ׃ 18 וְאִם-תֵּלְכוּן כַּאֲשֶׁר יוֹלִכֲכֶם הָרוּחַ אֵינְכֶם עוֹד תַּחַת מִשְׁטַר הַתּוֹרָה׃ 19 וּמַעַלְלֵי הַבָּשָׂר יְדוּעִים וְאֵלֶּה הֵם נִאוּף זְנוּת זִמָּה וַעֲגָבִים׃ 20 עֲבֹדַת אֱלִילִים וּכְשָׁפִים אֵיבָה מְרִיבָה וְקִנְאָה כַּעַשׂ מָדוֹן מַחְלֹקֶת וּמִפְלָגּוֹת׃ 21 מַשְׂטֵמָה וָרֶצַח וְדַרְכֵי סֹבְאִים וְזוֹלְלִים וְעוֹד אֲחֵרִים כְּמוֹהֶם אֲשֶׁר עֲלֵיהֶם אֲנִי אֹמֵר כַּאֲשֶׁר מֵאָז אָמַרְתִּי כִּי-עֹשֵׂי אֵלֶּה לֹא יִירְשׁוּ מַלְכוּת הָאֱלֹהִים׃ 22 וּפְרִי הָרוּחַ הוּא אַהֲבָה שִׂמְחָה וְשָׁלוֹם אֹרֶךְ אַפַּיִם נְדִיבוֹת חֶסֶד וֶאֱמוּנָה׃ 23 עֲנָוָה וְהַצְנֵעַ לֶכֶת וּלְמִדּוֹת כָּאֵלֶּה אֵין תּוֹרָה׃ 24 וּמִי אֲשֶׁר לְיֵשׁוּעַ הַמָּשִׁיחַ הֵם הִצְלִיבוּ אֶת-הַבָּשָׂר עִם-כָּל-תְּשׁוּקָתוֹ וְתַאֲוָתוֹ׃ 25 אִם-חַיֵּי הָרוּחַ בָּנוּ נֵלְכָה גַּם-בְּאָרְחוֹת הָרוּחַ׃ 26 וְכָבוֹד שָׁוְא לֹא נִרְדֹּף לְהִתְגָּרוֹת אִישׁ בְּרֵעֵהוּ אוֹ לְקַנֵּא אִישׁ בְּרֵעֵהוּ׃

ו    1 אַחַי אִם-אִישׁ מִכֶּם נִלְכַּד וְעָשָׂה אַחַת מֵאֵלֶּה אֲשֶׁר לֹא תֵעֲשֶׂינָה אַתֶּם אַנְשֵׁי רוּחַ הָקֵם תָּקִימוּ אֹתוֹ בְּעַנָוַת רוּחַ וְזָכַרְתָּ פֶּן-תִּלָּכֵד בְּמַסָּה גַם-אָתָּה׃ 2 שְׂאוּ עֲלֵיכֶם אִישׁ סֵבֶל רֵעֵהוּ וּבָזֹאת תִּשְׁמְרוּ אֶת-תּוֹרַת הַמָּשִׁיחַ׃ 3 וְאִישׁ כִּי-יֵחָשֵׁב בְּעֵינָיו כַּמָּה נֶחְשָׁב הוּא בִּהְיוֹתוֹ כִבְלִימָה מַתְעֶה הוּא אֶת-נַפְשׁוֹ׃ 4 אַךְ יִבְחַן אִישׁ אֶת-מַעֲשֵׂהוּ וְאָז יִשְׂמַח בְּמַעֲשָׂיו לְבַדּוֹ וְלֹא לְנֹכַח רֵעֵהוּ׃ 5 כִּי אִישׁ אִישׁ כֹּבֶד מַשָּׂאוֹ יִשָּׂא׃ 6 הַתַּלְמִיד לִמְלַמְּדוֹ דֵעָה יִתֵּן חֵלֶק מִכָּל-טוּבוֹ׃ 7 אַל-תַּשִּׁאוּ נַפְשֹׁתֵיכֶם הָאֱלֹהִים אֵין לְהָתֵל בּוֹ כִּי כַּאֲשֶׁר יִזְרַע אִישׁ כֵּן יִקְצֹר׃ 8 כִּי-הַזֹּרֵע לִבְשָׂרוֹ יִקְצֹר קְצִיר בְּשְׂרוֹ כִּלָּיוֹן חָרוּץ וְהַזֹּרֵעַ לָרוּחַ יִקְצֹר קְצִיר הָרוּחַ חַיֵּי עוֹלָם׃ 9 וַאֲנַחְנוּ בַּל-תִּרְפֶּינָה יָדֵינוּ בַּעֲשׂוֹת טוֹב כִּי-נִקְצֹר בְּעִתּוֹ אִם-לֹא נִרְפֶּה׃ 10 וְעַל-כֵּן אֵפוֹא בְּעוֹד יֶשׁ-לָנוּ יָדַיִם נֵטִיבָה-נָּא לְכָל-בְּנֵי אָדָם וְעַל כֻּלָּם לִבְנֵי בֵית הָאֱמוּנָה׃ 11 רְאוּ מָה-רַב הַמִּכְתָּב הַזֶּה אֲשֶׁר-כָּתַבְתִּי אֲלֵיכֶם בְּיָדִי׃ 12 אֵלֶּה הַמְבַקְשִׁים לְהִתְיַפּוֹת לָעֵינַיִם יְאַלְּצוּ אֶתְכֶם לְהִמּוֹל רַק לְמַעַן בַּל-יֵרָדְפוּ עַל-דְּבַר צְלַב הַמָּשִׁיחַ׃ 13 וְהַנִּמּוֹלִים הָהֵם אֶת-הַתּוֹרָה אֵינָם שֹׁמְרִים רַק חֶפְצָם כִּי תִמּוֹלוּ לְמַעַן יִתְהַלְלוּ בִּבְשַׂרְכֶם׃ 14 וַאֲנִי חָלִילָה לִּי מֵהִתְהַלֵּל זוּלָתִי בִּצְלַב יֵשׁוּעַ הַמָּשִׁיחַ אֲדֹנֵינוּ אֲשֶׁר-בּוֹ הָעוֹלָם צָלוּב-לִי וַאֲנִי צָלוּב לָעוֹלָם׃ 15 כִּי-בַּמָּשִׁיחַ יֵשׁוּעַ אֵין יֶתֶר עָז לֹא לַמּוּלָה וְלֹא לָעָרְלָה כִּי אִם-לִבְרִיאָה חֲדָשָׁה׃ 16 וְכָל-הַמְיַשְּׁרִים לֶכֶת לְפִי קְנֵה הַמִּדָּה הַזֹּאת שָׁלוֹם וְחֶסֶד עֲלֵיהֶם וְעַל-יִשְׂרָאֵל עַם הָאֱלֹהִים׃ 17 מֵעַתָּה וָהָלְאָה אַל-יַלְאֵנִי עוֹד אִישׁ כִּי אוֹת חוֹתַם הָאָדוֹן יֵשׁוּעַ נֹשֵׂא אֲנִי בִּבְשָׂרִי׃ 18 אַחַי חֶסֶד יֵשׁוּעַ הַמָּשִׁיחַ אֲדֹנֵינוּ עִם-רוּחֲכֶם אָמֵן׃


Index              Poster